काठमाडौं- राष्ट्रिय प्रहरी प्रशिक्षण प्रतिष्ठानमा तनाव व्यवस्थापनसम्बन्धी एक विशेष प्रशिक्षण कार्यक्रम सम्पन्न भएको छ।
कार्यक्रममा स्वामी आनन्द अरुणले प्रहरीका उच्च पदस्थ १५ जना अधिकृतहरूलाई राम्रो कार्य सम्पादनका लागि मानसिक सन्तुलन र तनाव न्युनिकरणसम्बन्धी प्रशिक्षण दिनुभयो।
प्रशिक्षणका क्रममा स्वामी आनन्द अरुणले आधुनिक जीवनशैलीले मानवीय मूल्यहरूमा गलत प्रभाव पारिरहेको बताउँदै भन्नुभयो, “तनाव भौतिक रूपमा हामी जति बिछिप्त भइराखेका छौँ, त्यति नै बढिरहेको छ। यसको मूल कारण हाम्रो जीवनका मूल्यहरू गलत दिशामा गइरहेका हुन्।”
उहाँले थप स्पष्ट पार्नुभयो कि यद्यपि मनोवैज्ञानिकहरूले थोरै तनाव आवश्यक ठान्छन्, त्यो निश्चित स्तर नाघेपछि मानसिक र शारीरिक रोगहरू देखा पर्न सक्छन्।
स्वामी अरुणका अनुसार, ध्यान अहिले विश्वभरका मानिसहरू खोजिरहेका छन्। उहाँले तपोवन आश्रममा ७ दिनको ध्यान कार्यक्रममा सहभागी व्यक्तिमाथि गरिएको एक अनुसन्धान उल्लेख गर्दै भन्नुभयो, “सो अध्ययनमा ६० प्रतिशतभन्दा बढी सहभागीमा तनाव कम भएको देखिएको छ। ध्यान गर्न थालेपछि मानिसको शरीरमा ‘ह्याप्पी हर्मोन’ बढ्न थाल्छ।”
प्रशिक्षणमा सहभागी प्रहरी अधिकृतहरूले तनाव न्युनिकरणसम्बन्धी महत्वपूर्ण जानकारी पाएको भन्दै धन्यवाद ज्ञापन गरेका छन्। उनीहरूले यस्तो प्रशिक्षणले तनाव कम गर्न र कार्यसम्पादनमा सकारात्मक प्रभाव पार्ने विश्वास व्यक्त गरेका छन्।
