बागलुङ । जिल्ला समन्वय समिति बागलुङको प्रमुखमा अमर थापा चयन भएका छन् । थापासहित उपप्रमुखमा होमनाथ शर्मा र सदस्य पदमा गठबन्धनका उमेद्वारहरु सर्वसम्मत चयन भएका हुन् ।
जिल्ला समन्वय समितिको निर्वाचन कार्यतालिका अनुसार बिहिबार दुई बजेसम्म सत्ता गठबन्धनका उमेद्वारबाहेक कसैको पनि उमेद्वारी नपरेकाले प्रमुख र उपप्रमुखसहित ९ जना सदस्य सर्वसम्मत चयन भएको सहायक निर्वाचन अधिकृत गंगाधर सापकोटाले बनाए ।
राष्ट्रिय जनमोर्चाको तर्फबाट उमेद्वारी दिएका थापा र नेपाली कांग्रेसको तर्फबाट उमेद्वारी दिएका शर्मासहित जिल्ला समन्वय समितिमा तीन दलको सहभागिता छ ।
सदस्यहरुमा महिला सदस्य नेपाली कांग्रेसको तर्फबाट उमेद्वारी दिएकी हरिकला पौडेल, एकीकृत समाजवादीको तर्फबाट उमेद्वारी दिएकी जसोधा शर्मा र राष्ट्रिय जनमोर्चाबाट उमेद्वारी दिएकी धनकुमारी खत्री सर्वसम्मत चयन भएका छन् ।
अल्पसंख्यक दलित सदस्यतर्फ नेपाली कांग्रेसबाट उमेद्वार बनेकी कौशीला बिक निर्वाचित हुँदा खुल्ला सदस्यतर्फ माओबादी केन्द्रका तर्फबाट हर्क बहादुर पाण्डे, कांग्रेसबाट टेक बहादुर अर्गेजा र पदम बहादुर क्षेत्री सर्वसम्मत निर्वाचित भएका हुन् ।
मुख्य निर्वाचन अधिकृतको कार्यालयले सर्वसम्मत चयन भएका सबैलाई निर्वाचनका प्रकृया पुरा गरेर घोषणाको तयारी गरिरहेको सापकोटाले बताए ।
बागलुङमा एउटा मात्रै प्रमुख जितेको नेकपा एमालेले कुनैपनि पदमा उमेद्वारी नदिएपछि सत्ता गठबन्धनमा रहेका दलहरुका बीचमा भएको सहमति अनुसार उमेद्वारी दिएका सबै सर्वसम्मत निर्वाचित भएका हुन् ।
