नेपाल प्रिमियर लिग (एनपीएल) क्रिकेटमा जनकपुर बोल्ट्सले आफ्नो अपराजित यात्रा जारी राखेको छ ।
कीर्तिपुरस्थित त्रिवि क्रिकेट मैदानमा लुम्बिनी लायन्समाथि एक रनको रोमाञ्चक जित निकाल्दै जनकपुरले आफ्नो अपराजित यात्रालाई कायम राखेको हो । लुम्बिनी भने लगातार चौंथो पटक पराजित भएको छ ।
जनकपुरले दिएको १३७ रनको लक्ष्य पछ्याएको लुम्बिनीले निर्धारित ओभरमा ७ विकेट गुमाएर १३५ रनमात्र बनाउन सक्यो । जितका लागि अन्तिम ओभरमा ९ रन चाहिएको अवस्थामा लुम्बिनीले दुई विकेट गुमाएपछि पहिलो जित दर्ता गर्नबाट चुक्यो । साद बिन जफर शुन्य र सन्दीप जोरा १६ रनमा आउट भए ।
क्याप्टेन रोहित पौडेलले ३५ र टम मुर्सले ३१ रन बनाएपनि जित भने दिलाउन सकेनन् । लुम्बिनीलाई सस्तैमा समेट्ने क्रममा हर्स ठाकरले ५ विकेट लिए । आफ्नो स्पेलमा २३ रन खर्चेर हर्सले ५ विकेट झारेका हुन् । किशोर महतो, ललित राजवंशी र शेर मल्लको नाममा एकएक विकेट रह्यो ।
