वीपी कोइराला स्वास्थ्य विज्ञान प्रतिष्ठान धरानको जग्गामा तरकारी बजार निर्माण गर्न धरान उपमहानगरपालिकालाई उच्च अदालत विराटनगरले रोक लगाएको छ । नगर प्रमुख हर्क साम्पाङले वीपी प्रतिष्ठानको ग्रिनबेल्ट मार्गमा तरकारी बजारको सेड निर्माण सुरु गरेका थिए । तर उच्च अदालत विराटनगरले मंगलबार काम रोक्न अन्तरिम आदेश जारी गरेको हो ।
मेयर साम्पाङले बजार निर्माण गर्न खोजेपछि वीपी प्रतिष्ठानका रजिष्ट्रार सूर्यप्रसाद संग्रौलाले प्रतिष्ठानको जग्गामा संरचना नबनाउन आग्रह गरेका थिए । तर साम्पाङले कर्मचारीसँग कुरा नगर्ने भन्दै उनको आग्रह मानेका थिएनन् ।
धरान भित्र प्रतिष्ठान रहेको दाबी गर्दै मेयरले संरचना बनाउने अडान लिएपछि संग्रौलाले उच्च अदालतमा रिट दायर गरेका थिए । उच्च अदालत विराटनगरका न्यायाधीश ध्रुवराज नन्दको एकल इजलासले ‘अन्तिम टुंगो नलागेसम्म कुनै पनि संरचना निर्माण नगर्नूरनगराउनू’ भनी अन्तरिम आदेश जारी गरेको हो ।
‘विपक्षी उपमहानगरपालिकाले तरकारी बजारको लागि शिलान्यास गरेको उल्लिखित जग्गा ग्रिनबेल्ट एरिया हो वा स्थानीय सरकारको क्षेत्राधिकार भित्रको जग्गा हो भन्ने विवादित अवस्थामै भौतिक संरचना निर्माण हुँदा निवेदकलाई पर्न जाने असुविधा, क्षति र स्वास्थ्य क्षेत्रको संवेदनशीलता समेतलाई दृष्टिगत गर्नुपर्ने स्थिति देखिएकाले निवेदन माग बमोजिम अन्तरिम आदेश जारी गर्न उपयुक्त हुने देखियो,’ उच्च अदालतले भनेको छ।
रिट निवेदनको अन्तिम टुङ्गो नलागेसम्म प्रतिष्ठानको नाममा दर्ता कायम रहेको सर्भे नक्सामा देखिएको कित्ता नम्बर १३ को जग्गा भित्र पर्ने गरी कुनै प्रकारको संरचना निर्माण नगर्न र प्रयोग चलनमा अवरोध नगरी यथास्थितिमा राख्न अदालतले भनेको छ ।
साथै उच्च अदालतले विपक्षी धरान उपमहानगरपालिका, मेयर साम्पाङ र प्रहरीलाई १५ दिनभित्र लिखित जवाफ पेस गर्न पनि आदेश दिएको छ ।
