नेपाली कांग्रेसका सांसद डा. सुनिल शर्माले पशुपति आर्यघाटमा शव व्यवस्थापनमा ५ लाख दिने घोषणा गरेका छन्।
बुधबार ९ वटा बेवारिसे शवको दाहसंस्कारमा सहभागी हुँदै उनले कात्रो किन्न समेत सहयोग नपाएको सुनाएपछि आफूले १०० वटा लाश जलाउन ५ लाख रुपैयाँ सहयोग गर्ने घोषणा गरे।
उनले बेवारिसे शवहरूको निशुल्क दाहसंस्कार गर्न सरकारले व्यवस्था गर्न आग्रह गरेका छन्।
डा. शर्माले बेवारिसे व्यवस्थापन तथा पुनर्जीवन केन्द्रका अध्यक्ष विनयजंग बस्नेतलाई नोबेल पुरस्कार दिनुपर्ने उल्लेख गर्दै, पशुपति आर्यघाटमा शव व्यवस्थापनमा समेत भ्रष्टाचार भइरहेको खुलासा गरे। उनले संघीय संसदको तलब भत्ता नलिने एक मात्र सांसदका रूपमा देशभर निःशुल्क स्वास्थ्य शिविर सञ्चालन गर्दै आएका छन्।
बेवारिसे व्यवस्थापन केन्द्रले हालसम्म ५६०० भन्दा बढी शवहरूको व्यवस्थापन गरिसकेको छ। यद्यपि, सरकारले निशुल्क सेवा दिने प्रतिबद्धता जनाए पनि ठोस सहयोग नपाएको गुनासो केन्द्रका अध्यक्ष बस्नेतले व्यक्त गरेका छन्। डा. शर्माको यो पहलले समाजमा सकारात्मक सन्देश फैलाएको छ र मानवता प्रवर्द्धनमा महत्त्वपूर्ण योगदान पुर्याएको छ।
