काठमाडौं । काठमाडौं महानगरपालिकाका नगर प्रमुख (मेयर) बालेन्द्र शाहले प्रमुख प्रशासकीय अधिकृत बसन्त अधिकारीको कार्यकक्षमा ताला लगाएका छन् । कार्यपालिकाको निर्णयमा कीर्ते गरेको पाइएपछि असन्तुष्ट बनेका मेयर शाहले राष्ट्रिय सभागृहस्थित अधिकारीको कार्यकक्षमा ताला लगाएका छन् ।
महागरपालिकाको स्वास्थ्य विभाग तर्फका कर्मचारी नियुक्तिको विषयमा मेयर शाह र प्रमुख प्रशासकीय अधिकृत अधिकारीबीच विवाद भएको थियो । विवादपछि मेयर शाहले अधिकारीलाई कार्यालय प्रवेशमा रोक लगाइएका थिए । सोही प्रकरणमा मेयर शाहका सचिवालय प्रमुख नुरनिधि न्यौपाने, स्वास्थ्य विभाग प्रमुख रामप्रसाद पौडेल, वरिष्ठ शाखा अधिकृत भगवती विडारीलाई निलम्बन गरिएको छ ।
केही दिन बिदामा बसेका प्रमुख प्रशासकीय अधिकृत अधिकारीले पुनः कार्यालय आउने तयारी गरेको थाहा पाएपछि मेयर शाहले उनको कार्यकक्षमा ताला लगाएको जनाइएको छ ।
